News#Urr1

Like us, find us, follow us      

Higgs bosoia, gizateriaren erabateko arrakasta

José Ignacio Latorrek, Universitat de Barcelonako Fisika Teorikoko katedradunak eta CERNeko ikertzaileak, iazko udako aurkikuntza zientifikoa gogoraraziz  hasi du bere hitzaldia. Gaur egun dagoeneko baieztatu den aurkikuntzari buruz aritu da: Higgs bosoiaren aurkikuntza, hain zuzen ere. 50 urte haren atzetik egon ostean, “Higgs bosoiaren aurkikuntza izugarrizko arrakasta izan zen gizateriarentzat” gehitu du Latorrek. “Aurkikuntza egin eta urtebetera, 10.000 Higgs ditugu bilduta sakon aztertzeko” ondorioztatu du.

Ciechanover, berrikuspena bizi-itxaropenaren mende magikoari

Aaron Ciechanover-ek, 2004ko Kimikako Nobel saridunak, gizateriak azkeneko 100 urteetan izandako aurrerapen medikoei buruz aritu da, posible egin baitute XX. mendea "magikoa izatea bizi-itxaropenarentzat. 100 urtean 30 urte handitu dugu bizi-itxaropena". Ezinezkoa ikusten du jakitea gaixotasun guztiak sendatzera iritsiko garen, bai eta zer ondorio izango lukeen ere hori lortzeak. Izan ere, XX. mendeko bizi-itxaropenaren handitzeak "hainbat gaixotasun agertzea eragin du, hala nola minbizia edo alzheimerra. Antzina ez ziren halakoak pairatzen, ez baikinen haiek garatzeko adina bizi", adierazi du.

HITZALDIAK
Obamaren garun zientifikoa
 

Rafael Yuste eta Columbia Unibertsitateko bere taldeak giza-garunak nola funtzionatzen duen ulertzeko grina dute. Horretarako, garun-azala ulertzeko erronka dute esku artean. Zergatik da garrantzitsua garun-azala ikertzea? Jarduera nagusi guztiak biltzen dituen atala da garun-azala, pentsamenduak, irudimenak… Halaber, “garuneko gaixotasunen jatorria da, eta zoritxarrez, ez dugu horiek sendatzeko konponbiderik, ez baitugu garun-azalaren funtzionamendua ezagutzen” adierazi du Yustek. Horregatik, Yuste eta  bere taldea Obamaren administrazioaren The Brain Activity Map proiektuan buru-belarri dihardute.

10 minutuko hitzaldi arin, fresko eta dibertigarrien bidez, kuantikarekin lotuta dauden gaiak izan dituzte hizpide Naukas plataformako hizlariek. Batzuek gai zientifikoak jorratu dituzte, hala nola Pablo Rodriguezek, molekulen geometriaz aritu baita, eta bizidunotan molekula batzuen forma jakin batzuk, eta ez besterik, agertzea eboluzioaren probatzat eman du. Beste batzuek, berriz, kuantikari lotuta sortu den sasizientziak salatu dituzte. Mauricio-José Schwarzek, adibidez, aipatu du sendabide kuantikoak bereziki arriskutsuak direla. Horrelako hitzaldi-sorta bihar eta etzi ere ikusteko aukera izango da Victoria Eugenia antzokian, Naukas plataformaren eskutik.

Bazenekien ...

Rafael Yuste zientzialari madrildarrak 2,5 milioi dolarreko (gutxi gorabehera 1,9 milioi euroko) saria jaso duela AEBn? Yuste giza-garunaren mapa eraikitzeko asmo handiko ikerketa-ekimen baten sustatzailea da, eta garuneko jardueraren mapa irudikatzeko aukera emango dioten teknika berriak aztertzeko baliatuko du NIH erakundeak esleitutako saria; garun-azalari buruzko ikerketa bat garatzeko, hain zuzen ere. Yusteren hipotesia baieztatzen bada, zientzia garunaren funtzionamendua ulertzetik gertuago egongo da. Zorionak Rafael!

Nobel Pitch-ak Nobel saridunak ikertzaile gazteekin elkartu ditu

16 ikertzaile gazte CIC nanoGUNEn elkartu dira gaur, Nobel Pitch tailer berezian. Bertan, Donostian bildu diren lau Nobel saridunei aurkeztu dizkiete beren ikerketak : Aaron Ciechanover, Claude Cohen-Tannoudji, Dudley Herschbach eta Jean Marie Lehn. 5 minutu izan dituzte aurkezpenak egiteko, ekintza hau elevator pitch deritzon ekimena baitu oinarri, alegia, azkar komunikatzeko teknika bat. Nobel Pitchean parte hartu duten bi ikertzailek azaldu dutenez, ekimena “bikaina eta beharrezkoa da, ez baitugu aukera handirik izaten alor desberdinetako ikertzaileak elkartzeko, eta esperientziak eta jakintzak trukatzeko. Gainera, Nobel saridunak bertan izatea plus bat da, zalantzarik gabe".