News#Urr4

Like us, find us, follow us      

Passion for Knowledge - Quantum 13ren agurra

Pedro Miguel Etxenikek eskaini du Passion for Knowledge – Quantum 13 jaialdiaren itxiera-ekitaldia. “Aurrera egiteko eta ezagutzeko grina honek dirauen bitartean, zientzia ekartzen jarraituko dugu guk”, nabarmendu du Etxenikek. Itxiera-ekitaldia ez da izan Passion for Knowledge – Quantum 13 jaialdiaren bukaera, ordea. “La entrevista” antzezlanaz gozatzeko aukera dago oraindik, hala Donostian nola Bilbon, Gasteizen eta Iruñean.

HITZALDIAK
Bizitzaren sekretua X izpien argitara
 

Amand Lucas, Belgikako Namur Unibertsitateko Fisikako Katedradunak X izpiek nola lagundu zuten Crick eta Watson-ek egindako aurkikuntzan azaltzen saiatu da publikoari. DNAren helize bikoitzaren edota “bizitzaren sekretuaren” aurkikuntzan, hain zuzen ere. “Niels Bohr fisikariak bizitza ezin dela azaldu idatzi zuen Light and life artikuluan” gogorarazi du. Artikulu hori argitaratu eta 20 urtera, ordea, 1953an, Watson eta Crick-ek balentria lortu zuten. Difrakzio optikoak horretan guztian izan zuen eragina hobeto ulertzeko zenbait esperimentu egin ditu Amand Lucasek Dudley Herschbach irakaslearen laguntzarekin.

Manipulazio genetikoaren ahalmena

Gizakiak natura eta bizidunak manipulatzeko garatu duen gaitasunaz aritu da Ginés Morata, eta zenbait adibide eman ditu. Haietako batean, muturra eta apatxak berde fluoreszente zituzten txerri batzuen argazkia ikus zitekeen, marmoka-gene bat sartuta zutelako. "Zertarako balio du horrek? -zihoen-. Egia esan, ezertarako ez, baina agerian uzten du gure gaitasuna". Abiapuntutzat hartuta biologia molekularreko teknologia berriek XX. mendeko gizartean izugarrizko eragina izango dutela, gaur egungo egoerara iritsi arteko ibilbide historikoa egin du Moratak.

Bazenekien ...

Batez beste 600 pertsona hurbildu direla Victoria Eugenia antzokira bost egunotan mekanika kuantikoaren gaia gertutik jarraitzeko? 520 pertsona izan dira Bilboko hitzaldi irekietara hurbildu direnak. Halaber, bigarren hezkuntzako 575 ikaslek goi mailako zientzialariekin hitz egiteko aukera izan dute top@DIPC-Zientziarekin solasean! topaketetan. Bestalde, bost minutu baino gutxiago izan dituzte 16 doktoratu osteko ikertzaileek beren ikerketa-lerro nagusiak azaltzeko Nobel Pitch saioko lau Nobel sariduni. Edizio honetako berrikuntzetako batean, prestakuntza tailerretan, 341 pertsonek parte hartu dute. Azkenik, BRW kongresu zientifikoan 68 pertsona bildu dira.

BRW BILTZAR ZIENTIFIKOA

30th Brandt Ritchie Workshop-ek nazioarteko zientzialariak bildu ditu

Passion for Knowledge – Quantum 13 bukatu da, eta, harekin batera, gaur amaitu da DIPCren egoitzan, jaialdiarekin batera, egindako 30th Brandt Ritchie Workshop (BRW) nazioarteko zientzia-mintegia. "Tradizioz workshop honetan jorratu diren gaietatik haratagoko ikerketa-gaiak txertatu dira oraingoan -nabarmendu du Marisa Faraggi partaideak-, hala nola gainazaletan jarritako molekulen elkarrekintza. Gai berriak jorratzeak aukera ematen du jendeak beste alor batzuekin harremanetan jartzeko, eta lan-lerro berriak sortzeko".